pastoral leta long year bilong holi spiriti

BISHOP CESARE BONIVENTO PIME
PASTORAL LETA
LONG YEAR BILONG HOLI SPIRITI
Vanimo 11th Jan. 1998
Dia Bratasusa,
1. Papa Santu Jon Pol II I bin invaitim yumi olgeta long litimapim nem bilong Holi
Spirit long dispela 1998, em namba tu yia bilong wok rere long Bikpela Jubili
bilong Yia 2000.
2. Husat em I Holi Spirit? Holi Spirit em I namba tu person bilong Holi Triniti. Em I
God, wantaim Papa na Pikinini.
3. Holi Spirit em I Spirit bilong Jisas, na em I strong bilong em. Long strong bilong
Holi Spirit, Jisas, Pikinini bilong God I kamap man, na em I mekim wok pris
bilong em, na em I dai na em I kirap gen. Jisas I kisim bek mipela long Papa
bilong em long wanem Holi Spirit I givim strong long em.
4. Jisas I save ol Aposel bilong em tu I nidim Holi Spirit long autim Gutnius, olsem
na long Pentekos em I salim Holi Spirit I kam long ol olsem paia I stap antap long
ol. Long dispela presen ol Aposel I kism strong na ol inap long autim gutnius
long olgeta pipel bilong graun.
5. Holi Spirit I givim strong tu long ol misineri, husat I autin Gutnius. long olgeta
hap bilong graun. Long dispela strong mipela I harim Gutnius long Papua Niu
Guinea. Sapos I no gat strong bilong Holi Spirit, I no gat man inap long autim
Gutnius.
6. Yumi olgeta tu i nidim helpim bilong Holi Spirit long autim Gutnius. Insait long
daisis bilong yumi I gat planti pipel I no save yet long Jisas o ol I no klia tumas
long Jisas. Ol I nidim bai mipela I go long ol long autim Gutnius. Tasol, sapos
Holi Spirit I no helpim mipela, mipela I no inap.
7. Long dispela yia 1998 yumi mas askim Holi Spirit long givim strong long mipela
olsem na mipela inap long autim Gutnius long olgeta hap bilong Daisis.
8. Long dispela de bilong Baptais bilong Jisas mi laik toksave long olgeta pipel
bilong daisis bilong yumi olsem tede yumi statim yia bilong Holi Spirit.
9. Namba wan bikpela selebresen bai I kamap long 25 de bilong Mun Mas. Last
bikpela selebresen bai I kamap long 18 de bilong Mun October, em I Misien
Sande.
10. Insait long dispela taim, olgeta wan wan peris bilong daisis bilong yumi I mas
organaisim wanpela bikpela selebresen bilong ol yet wan wan bilong askim holi
Spirit long kam daun long mipela. Ol dispela selebresen insait long ol peris bai I
go inap long tenpela de, olsem na olgeta pipel inap long harim Gutnius bilong
Holi Spirit, na tanim bel, na kisim olgeta Sakramen.
11. Insait long dispela yia, mi laik givim Sakramen bilong Konfirmatio long olgeta
pipel bilong daisis bilong yumi, long laik bilong Jisas. Dispela em I rot bilong
kisim Holi Spirit. I gat planti pipel I no kisim yet Conpirmasio. I gat sampela
manmeri I tinging olsemol I lapum tumas long kisim dispela bikpela sakramen. I
gat sampela pipel ol I pilim sem o ol I tingting olsem ol I no gat rait long kisim
dispela Sakramen. Nogat. Jisas I laik givim Holi Spirit bilong em long olgeta
bratasusa bilong em.
12. Sapos famili bilong yu I stret, sapos yu sori long ol pekato bilong yu, sapos yu
redi long autim gutnius, go long Peris Pris bilong yu, na askim em bai Bisop I
givim Holi Spirt long yu long Sakramen bilong Konfirmasio.
13. Yumi mas litimapim nem bilong Holi Spirit long dispela yia. Dispela em I yia
Bilong Holi Spirit. Long dispela yia yumi mas welkamim Holi Spirit olsem Mama
Maria I bin mekim long Nazareth. Sapos yumi laik givim Jisas long ol arapela,
pastaim yumi mas opim dua bilong bel bilong yumi long Holi Spirit olsem Mama
Maria I bin mekim.
14. Peris Pris bilong yupela bai I toksave long yupela long taim dispela bikpela
selebresen bai I kamap insai long peris bilong yupela. Yupela I mas bung wantaim
long redim gut dispela bikpela samting. Mi yet bai I kam insait long peris bilong
yupela bilong litimapim nem bilong Holi Spirit.
15. Synod bilong Oceania. Insait long dispela yia, olgeta bisop bilong Oceania bai I
bung wantaim Papa Santu long Rom, long panimaut wanem samting yumi, pipel
bilong Oceania, I mas mekim long bihainim laik bilong Jisas na tu long autim
gutnius olsem na olgeta pipel bilong graun I kism salvatien.
16. Bai dispela kibung I kamap gutpela tru, mi askim olgeta pipel long pre wanpela
spesiel pre bihain long olgeta Santu Misa. Askim dispela pre long Peris Pris
bilong yupela.
God I strong olgeta I blesim yupela,
(+ Cesare Bonivento)
Bishop bilong Vanimo