Homélie du Dimanche de Pâques 2013, prononcée par

Homélie du Dimanche de Pâques 2013, prononcée par

Homélie du Dimanche de Pâques 2013, prononcée par S.E. Mgr Daniel
NLANDU MAYI, Evêque de Matadi
Matadi/Paroisse Sainte Bernadette/Soyo, le 31mars 2013
Bampangi na munu na lukwikilu
Yenge !
Zola !
Alleluia !
Alleluia !
Banda mazono na mpimpa, beto ikele na kukembela diswekamu ya santu ya
lufutumuku ya Mfumu na beto Yezo-Kristo, diswekamu ya Paki !
Paki zola tuba kusabuka: kukatuka na kitombe samu na kuluta na n’temo;
kukatuka na lufwa samu na kukota na luzingu; kukatuka na kiwayi ya
masumu samu na kubaka kimpwanza ya bana ya Nzambi.
Yau yina Nsangu ya mbote ya kilumbu yayi ikele na kutubila bamama
kwendaka na kiziami na nsiuka-nsiuka, yau zola tuba na ntangu mpimpa
ke na zola bika kisika na n’temo.
N’sasa ya diswekamu ya Paki ikele diaka ti: na ngolo na yandi ya kulutisa
tezo, Nzambi me futumuna Mwana na yandi, me katula yandi na lufwa, mpe
mutindu yina yandi me vuluza bantu nionso mpe inza ya mvimba vuandaka
na kiwayi ya masumu mpe ya lufwa.
Nzambi me futumuna Mwana na yandi Yezo
Na ntangu Yezo vuandaka mona mpasi na dikuluzu, ntete yandi vutula
mwela na yandi na maboko ya Tata na yandi, bantu mingi banzaka ti yau
me manisa kwandi, Yezo me nunga na yandi vé, samu Nzambi me vuluza
yandi vé.
Bayina zolaka lufwa ya Yezo banzaka ti bau mé nunga. Kasi samu na bibuti
na yandi, bampangi mpe bakundi na yandi, yau vuandaka diambu ya kiadi
mingi. Bawu banzaka ti Nzambi lendaka vuluza mwana na yandi. Yau
vuandaka mpe mabanza ya balongoki na nzila ya Emmaüs: « Beto tulaka
kivuvu ti yandi fwanaka vuluza Israël, kasi yayi kilumbu ya tatu, kubanda
mambu yango me luta ».
2
Ya kyeleka, na ntangu kaka bantu ke banzaka ti diambu mosi lenda salama
diaka vé, Nzambi ke tubaka ! Nzambi ke monisaka kilendo na yandi. Petelo
ikele na kutelamena yau kimbangi: “Yezo yina beno komaka na dikuluzu,
Nzambi me futumuna yandi na bafwa”. Luzingu me nunga lufwa: Yau yina
Paki ya Mfumu!
Paki zola tuba kusabuka, kukatuka na lufwa, samu na ku kwenda na
luzingu. Kulemba kumona wonga, samu kyese yadila beto.
« Lufutumuku » ya bantumwa
Kubanda kilumbu yina ya lufutumuku ya Yezo, luzingu ya balongoki
kwizaka soba. Bawu kitukaka bisadi ya inza ya impa, inza yina bantu nionso
ke zolanaka, ke zingaka na kyeleka, na bunsongi mpe na ngemba. Yau yina
bawu vuandaka kumwanganesa, kondua kumona wonga, ti Yezo me
futumuka na bafwa. Mpe samu na yau, bawu kubamaka na kutelimina
Kristo kimbangi, tî na lufwa.
Lufutumuku ya Kristu, nini yau zola tuba samu na beto ?
Na mboteka, beto nionso ziamaka kisika mosi na Kristo, samu mutindu
kaka yandi me futumuka na bafwa na nkembo ya Tata na yandi, beto zinga
luzingu ya impa, luzingu ya Mpeve ya N’longo.
Na mboteka, beto katukaka na kitombe, mpe beto lutaka na ntemo; beto
katukaka na wonga mpe na kiwayi ya masumu, samu beto zinga na
kulandila nsiku ya nzola.
Kufwa sika mosi na Kristo zola tuba kulanda banzila na yandi. Lukula yandi
zolaka kaka kulungisa luzolo ya Tata na yandi, beto mpe fwete zingila
mutindu yina.
Kulungisa luzolo ya Nzambi, ikele kunata Dikuluzu, na kulanda mbandu na
Yezo Kristo. Yau ikele mpasi samu na beto, mpamba vé na luzingu na beto,
beto ke zolaka kaka kusadila luzolo ya beto mosi.
Yezo tubilaka beto yau: « Konso muntu yina zola landa munu, yandi
kukizimbakana, yandi baka dikuluzu na yandi mpe yandi landa munu.’’
Kufwa sika mosi na Kristu zola tuba kupona kyeleka ya Nzambi, kundima
bawu mona beto mutindu bilawu samu na nzola ya Nzambi mpe ya bakundi.
3
Kana beto me landa Yezo, kana beto me sala ngolo na kulungisa luzolo ya
Nzambi na luzingu na beto, nzambi lenda bika beto ata fioti vé. Yandi ke
futumuna beto na Kristo.
Bakristu na munu ya nzolua,
Konso muntu lenda kiyuvusa, kana na luzingu na yandi, yandi ke sosaka
kulungisa luzolo ya Nzambi; luzolo yina ke kuminaka beto na malongi ya
Dibundu, na ba ndongeselo ya bampangi na kati ya dikanda, na ba CEVB ya
beto, na bisika ya beto ya kisalu, etc. Beto fwete vuanda mpe bantu ya
kivuvu na Nzambi.
Kutula kivuvu na Nzambi
Kutula kivuvu na Nzambi, yau zola tuba kubika luzolo ya Nzambi salama na
luzingu ya beto, na bampasi ya beto ata ya ngolo mingi mutindu maladi,
lufwa, kukondwa kisalu, kusosa dikwela… Na nionso yina, beto fwete tula
kaka kivuvu na Mfumu na beto, kondwa kusosa ba mvutu na banzila ya
kitombe, na bankisi…
Kutula kivuvu na Nzambi, yau zola tuba kusala nionso beto lenda, na ntima
na beto ya mvimba, mpe kubika yandi pesa beto sendo na beto; yau zola
tuba kundima na ngolo nionso ti, na kati ya bampasi ya beto ya ntangu yayi,
Nzambi kele na beto mpe yandi ke na kusala; yau zola tuba diaka kuvuanda
na lutatamanu ya kimukristu, mutindu ke na kulombila beto yau
diswekamu ya lufutumuku.
Nzambi yandi mosi kaka ikele na mpova ya nsuka, mpe mpova yina ikele
luvuluzu yandi silaka nsilu na bayina me yamba na lukwikilu Mwana na
yandi.
Beto landa mbandu ya bantumwa: awa bawu kutanaka na Yezo me
futumuka, bawu vutukaka diaka manima vé. Ngolo ya yandi me futumuka
yadilaka bawu, mpe bawu bakaka ngolo ya kumwanganesa Nsangu ya
mbote na kyese, na kimbangi ya luzingu na bawu ya nzola mpe ya kimpangi.
Mutindu mosi na beto mpe: awa sika mosi na Kristu, beto me kufwa samu
na kubaka luzingu, beto fwete kituka n’temo ya inza mpe mungwa ya
n’toto. Yau yina ikele, bampangi na munu, bangindu to luzolo ya Diocèse
na beto na mvula yayi ya lukwikilu, ikele mpe mvula ya Synode. Konso
mukristo fwete sala ngolo na kukituka muntu ya impa na kulanda n’temo ya
Kristo me futumuka. Mutindu yina beto ke sobila luzingu, na kukitula yau
ya impa mutindu bantumwa salaka yau na luyantiku ya Dibundu.
4
Samu na Diocèse ya beto, luzingu yayi ya impa fwete monika na kintwadi ya
ngolo fwete vuanda na kati ya banganga-Nzambi, ba frères mpe ba ma
sœurs, baminkwikizi nionso, samu ti beto nionso, na ntima mosi, beto toma
twadisa bisalu ya Dibundu na beto.
Mutindu Santu Paul tubilaka bakristu ya Mbanza Colosse: « Bampangi, beno
me futumuka na Kristo. Yau yina beno sosa kaka makyeleka ya zulu; kuna
ndé Kristo ikele, ya kuvuanda na lubakala ya Nzambi. Beno landa kaka
makyeleka yina ya zulu, kasi ya ntoto yayi vé (Col 3, 1-2).
Bika n’kinzi yayi ya Paki, dituku ya lukwikilu na beto mpe kivuvu ya
kyeleka, vwanda samu na beto nionso, dituku ya ban’sambu ke kuiza buta
mbuma na bantima na beto bakristo ya Diocèse ya Matadi.
Bika Mama ya zulu, Mwenze Maria, vwanda na beto nionso, mutindu yandi
vwandilaka na balongoki na ntangu bau kuwaka nsangu ya lufutumuku,
mpe yandi bakila beto na Mwana na yandi me futumuka, ban’sambu ya
kusobila ban’tima na beto samu ti, na ntwala, Diocèse na beto kwiza soba.
Amen.