Griaß God beinand, mir is des heit a ganz besonders

Griaß God beinand,
mir is des heit a ganz besonders Anliegen, dass i de Pollinger
persönlich a paar Mass servier, weil`s so zahlreich do san, obwoi bei
ehana heit ja aa s`Starkbierfest is.
Es is ja ned oiwei ganz leicht.
Amoi ward`s jo aa ned do, nochad war`n de Neukirchna a weng
o`gressn und iatz hams hoit Angst ghobt, dass heier wieda ned
kemmts,weil bei enk eben aa agrat hei d Fastenpredigt is.
Aba iatz sands olle z`fried`n.
Wia bei dem Gleichnis vom verlorenen Sohn.
Und damit`s mia ned geht wia dem Vater von dem verlorenen Sohn,
weil wia`s ja wisst`s, war dem ja sei anderer Sohn beleidigt, wia er
dem andern verziehn hod.
Drum hob i für enk Taufkirchna a glei vorsichtshoiber a paar Mass
dabei.
So, oane hätt i iatz no übrig - de kunnt i iatz a da Prominenz gehm oba i kannt mir`s aa soiber koit`n.
I glaab a bissl a Egoist muaß ma ab und zua scho sei.
So, liebe Zuhörer, Brüder und Schwestern im Herrn aus nah und fern,
no moi a herzlichs Griaß God zur vierten Fastenpredigt im Rahmen
des Starkbierfestes der Schützen.
Vorstoin glaab i brauch i mi nimmer extra, weil es wisst`s es ja eh,
I bin der da Bruder Jonathan - und do bin i dahoam.
I hoff es seid`s g`schickt, dass i enk d`Leviten a wenig lies.
Und wenn`s grod a bissl as G´wissn g`redt is.
Wenn I do a so obeschau, nachad seg I scho a paar ganz Scheene,
über de wos grod gnua zum sogn gibt.
Übrigend scheene, do foid mia grod ei, hobs es aa g`heat, in England
hams kürzlich a Umfrage g`macht, und do is asserkemma, dass mia
Deutschen mit Abstand de gröbsten Leit auf da Woid sand.
Oiso i konn des aus meiner Perspektive ned bestätigen.
Na ja, i konn ma des grod a so erklärn, dass se Englända bei dera
Umfrage soiba ausg`nomma ham, wei sonst kunnt ma mir unmöglich
letzta worn sei.
Und obndrein, wer nimmt de Engländer scho ernst.
Wos anders war`s g`wen, wenn des Ergebnis z. B. in Nigeria oder in
Ghana ausakemma waar.
Des hätt uns wirklich troffa, oba a so.
Jetzt mecht i oba ned länger obschweifa und schee langsam zum
Ernst kemma.
Grosse Anweisungen glaab i brauch i enk nimma gebm, weil es wards
de letzten Jahre so aufmerksame Zuhörer und a so a guads Publikum,
dass kaum mehr steigerungsfähig is.
Do dad se de Kinseher am Nockerberg wahrscheinlich d Finga
obschlecka, wenns enk amoi hobn kunnt.
Oda aa sie Herr Pfarra?
Nur um oans woid i eich no bitt`n, weil des letzte Johr so guad
hig`haut hod.
Und zwar, wenn enk noch Klatsch´n is, dann duads des, und i kann
derwei amoi tringa.
I glaab es finds scho de richtige Dosierung.
Und no oans: Wenns später wirklich drokemmt`s, versuachts aa über
enk soiba zum Lacha.
Wenns a ned leicht foid, oba passts auf, dass koa G´sichtslähmung
griagts.
So, dann stürzt ma uns eine in de große Woidpolitik.
In Amerika stehnt ja heier scho wieder die Wahlen o.
Und a sowia se de Umfragen gestalten, verspricht des nix guads, weil
de Republikaner wieder auf`m Vormarsch san.
Mir mecht kaum glaam, dass sovui wahnsinnige, geistig
minderbemittelte Kandidaten von oana Partei gibt.
Ois Beispiel nimm i amoi den Mitt Romney.
Des is weiß Gott koa lauda, aber er is – so traurig wias klingt- da
Besser von dene.
De Nächsten, de bei de Vorwahlen folgen sand der Santorum und der
Gringich.
De zwee hand mit`n IQu scho ganz schee unter Zimmertemperatur.
Und wer no im Hinterkopf hod, dass vor kurzem de Sarah Palin aa no
im Rennen war, dann langt ma si wirklich irgendwann as Hirn auffe.
De kannt nämlich IQu-technisch a da Gabriele Pauli sei Schuaputzerin
sei.
Aba wos reg i mi auf, wer sich a bissl mit Politik befasst, der woas wos
Republikaner sei hoaßt.
Handfeuerwaffen legalisieren, Loyalität gegenüber den Ölmultis,
Aufrüsten und de Militärmaschinerie in Gang halten und wo möglich
noch mit`m Kuck- Kluchsclan sympatisieren.
Kaum auszudenken wenn de wieder an die Regierung kammand.
Vermutlich dad ois wieder von vorn ofanga.
Und weil ma ja inzwischen mit de Russn und de Chinesen
sympatisiert, müsst`n wahrscheinlich wieder die bösen Muslime
herhalten.
Weil irgend a Feindbild brauch der Amerikaner.
Und wann`s grod in an Zeichentrickfilm is.
Auf jeden Fall wäre der nächste Krieg vorprogrammiert.
Israel hat seine Mittelstreckenraketen bereits in Stellung brocht, um
den Iran anzugreifen.
Die warten nur noch auf grünes Licht aus den USA. Und des kriagadns
von de Republikaner no heit, wenns an da Macht warn.
Und wenn des jemand verhindern kann, dann höchstens da Obama.
Hoff`ma um des Frieden`s willen, dass uns de Republikaner daspart
bleim.
I frog mi grod, wann endlich die Menschheit, allen woran die
Regierenden, kapieren, dass Krieg nie Sieger hervor bringt.
Oder dass eine irakische oder afghanische Mutter am sinnlosen Tod
ihres Kindes genauso zerbricht wie eine amerikanische.
Und wenn man dann noch bedenkt, dass ein Präsident Busch mit
seinen Kriegszügen Amerika fast in den Staatsbankrott geführt hat,
dann fragt man sich, wie kurzsichtig dieses Volk doch sei muaß.
Apropos Bankrott – des gibt`s bei uns in Europa leider aa.
Wenn aa mehr durch Korruption als durch Rüstungsausgaben – aber
immerhin.
Die Finanzkrise, schwerpunktmäßig in Griechenland, beschäftigt uns
nun scho über a Jahr.
I woas gar nimmer wiavui Hilfspakete in dreistelliger Milliardenhöhe
scho g`schnürt worn sand.
Und wenn ma dann bedenkt, dass Griechenland nur der Anfang ist,
nachad frogd ma si, ob der Rettungsschirm jemois glangt.
Übrigens, wisst des wia des mit dem Rettungsschirm funktioniert?
I dad enk des gern an am kloam Gleichnis wiedergebn: Oiso a
weitschichtiger Bekannter leicht se von dir 50.Euro aus.
Nach geraumer Zeit frogst amoi noch, was denn mit`m Goid waar.
Drauf sogt er, dass er zwar willig waar, aber momentan waars hoid
grod ganz schlecht.
Trotzdem macht er dir folgenden Vorschlag: Wennst eham iatz an
Hunderter gaabst, dann kunnt er dir den Fuchzger sofort z`ruckzoin.
Und wennst eham – weils grod dabei seids- no moi zwoa Hunderter
gaabst,
nachad kunnt er dir den andern Hunderter aa glei wieder
z`ruckgeb`n.
Dafür wards aber dann quitt.
Aber wieder z`ruck zum Thema.
Trotzdem, glaab i is wichtig, dass ma Griechenland in der Eurozone
hoid.
Sicher miass`n de ehna Korruption in den Griff griang`n, weil der
kleine Mann, der momentan auf d Stoss geht, der kann nix dafür.
Aber ich warne davor, Griechenland zum Euro-Ausstieg zu drängen,
weil dann gibts a Kettenreaktion.
Und wozu das führt hat unsere Kanzlerin haarscharf analisiert.
„Wenn der Euro scheitert, dann scheitert Europa“.
Ich bin sicher, wenn das passiert, nimmt der Nationalismus
besonders in den zerfallen Vielvölkerstaaten, wieder schärfere
Dimensionen an.
Die Konflikte mehren sich und alte Wunden sind schneller
aufgebrochen als man denkt.
Zumal der Balkankrieg so lang no ned her is.
Deshalb, und nicht nur darum, soid ma dankbar sei um unser Angela.
I konn`s einfach nimmer hörn, wenn simg`scheite Satiriker oder
selbsternannte Politexperten immer nur auf ihrer rumhacken.
Von 35 EU-Staaten, dand se 34 d`Finger obschlecka, wenns a soiche
Kanzlerin hätt`n und mir suacht ma immer nach dem Haar in da
Suppm, des gar net gibt.
Die einzige Stabile an Europa ist Deutschland-Frankreich oder MerklSarkozy.
Man kann den Sarkozy meng oder ned, ober er woas um wos geht
und Frankreich hat aus der Vergangenheit glernt.
Wos ma von de Engländer weiß Gott ned behaupt`n konn.
Allenvoran ehana schwindliger Premier da Cameron, weil der is nur
destruktiv.
Aber des war scheints immer scho Britisch, nirgends integrieren und
wenn`s um Grundsatzentscheidungen geht s`Maul am weitesten
aufreissn und einfach dagegn sei.
Ma konn grod hoffa, dass de Zeit bis zu den nächsten Wahlen in
Frankreich und Deutschland ausreicht, um Europa zu stabilisieren,
weil weder da Sarko noch d Angela ham guade Karten, dass vom
eigenen Volk wieder g`woid wern.
Und do war ma scho beim nächsten Thema:
Die neuen Strukturen in der Parteienlandschaft.
Ja i glaab bei uns in Bayern kunnt`s gor ned a so zua geh, dass unser
Seehofer ned doch wieder Ministerpräsident wird, wenn a no a Zeit`l
hi is.
Weil der is wia a Chamelion.
Der hod ois drauf.
Von schwarz auf grün - a bissl goib.
Und rout bringt der garantiert aa no hi.
Und wenn alle Stricke reiss`n nachad g`frein se die freien Wähler,
wenn er mit ehna zamm gehn.
Des is die wahrscheinlichste Lösung, weil mit de FDP-ler do g`winnst
ned amoi no` s Koat für Bleamekesl.
I mecht mi ja ned wichtig macha, oba des hob i de letzt`n Jahre
vorausg`sogt, dass ma mit dem ausrangierten Inventar nix mehr
g`winna ko.
Und i bin mir fast sicher, dass de d`Leutheusser-Schmarrnbergerin no
dabei is, wenn`s bei oan Prozent hand und sie bereits mumifiziert is.
G`spannt bin i aa, wiavui Blinde dass bei uns in Bayern gibt, de de
Piraten woind.
Sicher is, de Karten wernd neu gemischt.
Auch auf Bundesebene.
Aber des is a anders Thema.
De Roten rechnen so ja allerhand aus mit ehnam oid`n Dattergreis, an
Ude.
Und er soiba glabt aa, wenn ma Bürgermoasta konn, nachad konn ma
aa Ministerpräsident.
Aba dazua miassat ma erst amoi g`woid wern.
Wia auch immer, nächst`s Jahr samma schlauer, aber bittschön woids
ned de linken oder die Pirat`n.
Aa ned aus Protest!
Weil des sand Diletanten.
Aprobos, wissts wos echte Diletenten hand.
Unsere Geheimdienste.
An Bundesnachrichtendienst hams nämlich Baupläne g`stoin und do
warn durchaus sensible Unterlagen dabei.
Do frog i mi scho, wia soid denn de anderweitig wos ausrichten,
wenn de ned amoi auf eahna Zeig aufpassn kinnand.
I woas ned wias enk geht, aber mia kimma des via, es wia wenn d
Mais a de Katzn d Mille zamsauffan.
Aussendem hod da Verfassungsschutz zwar jahre lang de Linken
überwacht, aber aufm rechtn Augn warns blind.
Über ersteres kunnt ma ja no Lacha, weil de Linken rekrutieren se ja
eh zur Hoifte aus ehemalige Stasispitzl.
Aso gsehng miassatns mit dem ja umgeh kinna, weil sie ham ja
jahrzehntelang nix anders do ois andere ausspioniert.
Aba, dass ma zehn Jahr braucht, um aussa z finden, dass hinta de
sogenannten Dönermorde de Brauna steckand, des is wahrlich
nimmer lustig.
Do gehn oam doch d Schuabandl auf.
I sog enk, i hauad den gesamten Verfassungsschutz samtn BND zum
Deife.
Aba kurz nomoi zruck zu unserm Horste, und do mecht i dann
überleit`n zu am andern Thema.
Wia`s sicher wisst is er ja momentan Bundespräsident.
Aba do is er ja dazua kemma wia d`Jungfrau zum Kind.
Weil nämlich unsere letzten Bundespräsidenten so lang herhoidn`t
ham, wia z. B. a koreanischer Winterreifen im Summer.
Da Wulff hods ja fast 600 Tog g`schafft.
Sicher , kann ma drüber streit`n, ob er denn z`rucktret`n hod miassn
und über des Warum.
Freile, deaf ma die Macht der Presse ned unterschätzen.
Aber wer in dem Zusammenhang sogt, die Presse kann jeden
beliebigen Politiker dermaßen in die Enge treib`n, dass eham nur no
der oane Ausweg bleibt, der macht sichs a bissl leicht, find i.
I glaab eham war nimmer zum Hoifa.
Dass bei am Menschen in der Position jeden Tog oana vor da Tür
steht, um irgendwelche Annehmlichkeiten zu vermitteln, des is klar.
Aber deaf as aa ohnehma?
Zumal de Lobbyisten ja irgendwoiche Gegenleistungen erwarten.
In welcher Form auch immer.
I frog mi grod, wos a so a Bundespräsident überhaupt z`doan hod.
Anscheinend no weniger wia ma glabt, weil sonst hätt er ja de ganzen
Angebote, wo er überoi Urlaub macha ko, gor ned o`nehma kinna.
A so g`sehng war ja unser Bundespräsidenten da reinste Mietnomade
Und dass der arme Teife a hoibe Million Kredit braucht, wenn a se a
Heisl kaffa mecht, des is allerhand.
Ja hod denn der ois Ministerpräsident so schlecht verdient?
Kaum zum Glaam.
A seiner Bettina ihr Tattoo wead jo aa ned d Woid kost ham.
Umsonst Urlaub macha, ständig eig`lodn wern, nix zoin, ja wo hod
denn der guate Mo sei Goid hibrocht, hod da Doihammer neilich
g`sogt.
Aba loss ma uns des Ganze no moi auf da Zung zergeh.
Der Mo hod se jo schlielich koa Dachsuit in Monaco kauft, na es war a
Backsteinheisl in Großburgwendel, jawoi in Großburgwedel.
Und do braucht der an Kredit.
Do drüber lacht ma doch mia, geh Sepp.
Na guad, du a wenig lauda wia i – aber immerhin.
Aber nomoi im Ernst.
Zu Fall hod er sich letztendlich soiber brocht, weil er ständig glong
hod.
Des verzeicht niemand.
Und merkt senk des oane.
Wasserstandsmeldungen, in Form von Halbwahrheiten, je nach
aktuellem Stand der Ermittlungen abzugeben, is nix anders, ois liagn.
Gleichzeitig hod er sein Weggefährten und Sprecher, einen gewissen
Gleasecker, dessen Haus im Zuge der Ermittlungen durchsuacht
wordn is, erst entlassen und dann zur Offenlegung aller
Machenschaften aufgefordert.
Er red von Transparenz.
Ja geht’s übahaupt no. Schaugt uns der für bleed o oder nimmt der
seine Tablettn ned reglmäßig.
Obendrein hod er vor kurzem erst no g`moant, dass spätestens in am
Jahr Gras drüber g`wachsen waar, und dann dad eh koana mehr
drüber red`n.
Des grenzt ja scho an Überheblichkeit.
So ein Bundespräsident war nicht mehr tragbar.
Der Imageschaden für Deutschland ist enorm.
Ob so oder so.
Iatz werds dann da Gauck, und i glaab der hods verdient.
Schließlich war er in der DDR Bürgerrechtler und hod jahrelang de
Behörde mit de Stasiunterlagen geleitet.
Alloa,dass`n de Linken, oblehnand, ist Ehre genug.
Aber ganz kurz no a paar ernste Sätze zu dem Thema.
I find, dass des Liang in dem ma bewusst an Teil von da Wahrheit
weglosst, bei uns ein schleichendes Problem in der ganzen
Gesellschaft worn is.
Nur allzu leicht kimmt ma heitzutogs mit sowos durch.
Manche wandln se a so durch eahna ganz Leben, ohne dass jemois
zur Rechenschaft zogn wernd.
So, aba iah wende me endgültig unsere Gäste zua.
Ò`fanga dua i mit de Taufkirchna, ganz gerecht, weil`s Bier ham zèrst
de Pollinger kriagt.
Ja, aa Taifkircha is koa Insel von Glückseligen.
Des is uns heier richtig bewusst worn, wenn ma de Zeitung genauer
g`lesn hod.
Es i do meistens um de Freiflächenphotovotaikanlagen ganga.
Nachdem die erste aus dem Boden gestampft war, sollten die
Planungen für de zwoate beginna.
Aba do ham de Taufkirchna de Rechnung ohne an Wirt g`macht, wia
ma so schee sogt.
Weil se de Anwohner plötzlich querg`legt ham.
Pikanterweise san des Zeilinger.
Und des gibt dera Sach no a biossl mehra Brisanz.
Wer dem iatz ned ganz folgen konn, dem sei g`sogt, des sand wia d
Flossing für de Gemeinde Polling.
Oder da Kaukasus für Russland.
Oder so…
Fakt is, dass de zwoate Freiflächenanlage obg`lehnt worn is.
Oiso i konns versteh, dass ma sich rund um sei Wohngebiet ned ois
zuapflastern lossn mecht.
De Betreiber is des wurscht, die wohnen meistens weit weg von
soichane Sehenswürdigkeiten.
Manchmoi frogt ma so scho wo des amoi end`n soid, wenn`st a so
durch die Gegend fahrst und an de unmöglichesten Orte PV-Anlagen
segst.
Nebenbei wird über Industriegebiete gestritten, weil täglich in Bayern
so und so vui Kulturlandschaft draufgeht.
A bissl obg`fahrn des Ganze, find`s ned aa.
Iatz wend ma uns aber wieder schönere Themen zua.
Letzt`s Jahr im Oktober war in Kraiburg a Missionsgottesdienst.
Gleichzeitig war beim Soizdorfer Kirta.
Waar weita nix B`sonders, wenn ned de akrat do an Tisch reserviert
hätt`n.
Auch meine Wenigkeit war mit an Haufa andere Neukirchner do.
Ebenso enka Bürgermoasta da Jakob.
Wia dann de ganzen Teilnehmer von dem Missionsgottesdienst
aufmarschiert san – und do war jede Hautfarbe vertreten, von gelb
bis dunkelschwarz – hod se da Jakob uns gegenüber zu der Aussage
hinreiss`n lossn:
„Geh do schaugt`s es Oberneukirchna wia schwarz dass bei uns de
CSU ler sand“.
I habm dann zur Rede stoid und g`fragt, ob er den ganzn Aufmarsch
inzeniert hod.
Des is aber bis dato ned ganz geklärt, weil i ned g`sehn hob, ob er für
de Soin de Zech zoid hod.
Mia zwee samma dann zu dem Schluss kemma, grod schod, dass ma
unsern CSU-Vorsitzenden, an Schuima Rupert ned dabei ham.
Ja und nachad is mir no zu Ohren kemma, dass du dir doch wieder an
Lapsus erlaubt host, Jakob.
Du bist ja fast straftätig worn.
Stoi da vor, wenn des grichtsmassig worn waar.
Da Jakob hod se nämlich a kloans Lagerfeier o`kent.
Nur s Brennmaterial hätt er a bissl sorgfältiger auswoin soin.
Statt Hoiz hod er nämlich Pappkartons und oide Socka g`numma.
Er wead se hoid denkt hom: Oba brenna dads guad.
Auf alle Fälle is als bald d`Feierwehr und de Polizei dostand`n.
I woas zwar ned wos du dene verzoid host, aber wenn i z`ruckdenk,
wost ma du am Kirta verklickert host, nochad wundert`s mi ned, dass
de du einer Bestrafung entzogen host.
Aba as G`wissen ham dann doch ganz schee gred, wia i erfahr`n hob.
Von wegen Bürgermoaster – Vorbildfunktion …usw.
Aba oiwei Vorbild sei, is hoid aa ned ganz leicht.
Des gelingt ned amoi uns geweihten Männern, oi wei, geh Herr
Pfarrer.
Und iatz woid i eigentlich wieder die Brücke zum Pollinger
Bürgermoaster schlog`n, aber der is ja heier leider ned do.
I hob ja bis vor kurzem no ganz fest mit eham g`rechnet, weil er ja
z`Neukircha ganz fleißig auf die Veranstaltungen is.
Inzwischen g`foids eham bei uns so guad, dass er an Speispfinstawers ned versteht – des is da Gründonnerstog, sogar zum
Fiaßwoschn kimmt.
Und den zwoaten Bürgermoasta hod er aa no dabei ghobt.
Iatz woaß i grod ned, hod des aa wos mit Vorbildfunktion z`doa oder
hod`s enk s Fiaßwoschn so not do.
Des sei iatz dahingestellt, aber scheint`s hob`s eich domois no besser
verstand`n.
Weil erst kürzlich ham se de Zwee, der erste und da zwoate
Bürgermoaster ganz sche z`haut.
Und des wega na Lapalie.
Z`Polling hod der Pfarrgemeinderat an Kurs für
Beckenbodengymnastik o boten, welcher im Pfarrhaus stattfinden
hätt soin.
Weil se aber so vui o`gmoid ham, wuidn`s in de Turnhalle ausweicha.
G`frogt hams aber an Kronberger Lenz und ned an Schmidbauer
Hans.
De Kloanigkeit hod dann zu an soichn Eklat g`führt, dass da Lenz aus
Protest de Gemeinderatssitzung verlassen hod.
S`nächste Moi is des Ganze dann auf Tagesordnung kemma und is
natürlich aa prombt genehmigt worn.
Wenn ma des aso head, mecht ma se ois Aussenstehender fast frogn,
ja habts es z Polling koa andere Probleme, dass ma über sowos
streitn ko.
Oder is des schuid, dass z’ Polling so vui Leit an labilen Bechenboden
ham, weil sunst hätts jo im Pfarrhaus bleim kinna und der Streit waar
erst gar ned entbrannt.
Aber wie dem auch sei, bei uns z Neikircha wird sowos ganz
unbürokratisch glöst.
Do deaf praktisch a jeder ins Gemeindehaus eine, und da erste und
da zwoate Burgermoasta sand ein Herz und eine Seele.
Ja, z Polling scheints waar ois a bissl komplizierter.
Alloa Verantstaltungen a so z leng, dass a Leit higehn, is fast
unmöglich.
So geschehen an Schützen- und Feierwehball.
Man mecht moan des dad jo doch an Haufa Leit betreffa, oba weit
gefehlt.
Es kimmt oa Tisch Feierwehrler und oanadhoib Tisch Schützen.
Der Rest sand Auswärtige.
Oiso traurig is des scho.
Oba wos mechst macha, hitrogn kannst koan.
Gscheiter es kemmts zu uns fleisse, nachad kemman d Neukirchna aa
weiterhim zahlreich zu enk.
A so g sehn waar de Entscheidung heit in unser Starbierfest zum geh,
vollkommen richtig.
So,und iatz deafs zuahearn, wia i ma de unsan vornimm.
Ja habts es übahaupts scho mitkriagt, mia Oberneukirchner sand
Millinär.
Ja, ja i moan enk scho oisam, weil bei uns is des ned so
soibstverständlich, dass des a jeder wissen deaf.
Weil des Unbürokratische, wos i z erst gmoant hob, schlogt bei uns
oft ins Geheimnisvolle um.
Iatz, wo ma endlich soweit sand, dass ma wissn deafand wos Goid do
is, habts uns a da Bürgerversammlung verheimlicht, dass aufs
Gemeinde- und auf s Feierwehrhaus a PV-Anlag installiert wird.
Warum ned? Des kann koa Mensch nochvoiziahgn.
Wos soin mir einfachn Bürger dagegn ham, wenn de Gemeinde
unser Goid – i deaf doch unser Goid sogn Franz – in a PV-Anlag
investiert.
Sowos muaß doch ned in den nicht öffentlichen Teil einer
Gemeinderatssitzung.
Und wos dem Ganzn die Krone aufsetzt is, dass genau oan Tag nach
da Bürgerversammlung mit de Arbeitn o gfangt worn is.
Auf d Nacht in da Versammlung koa Wort und a da Friah wird s Grüst
aufgstoid.
Des grenzt scho an Verarschung.
Do frogt se dann da oane oder andere ned zu Unrecht, warum er
überhaupt a da Bürgerversammlung geh soid.
Naja, iatz is wia s is. Bleibt zu hoffen, dass ma nächts Johr a bissl
genauer informiert wern, wia unser Goid vermehrt, bzw. aa ebbs
davo ausgehm werd.
Neulich hob i in da Zeitung glesn, dass sogor über die
Dorfverschönerung, respektive de Parkplatzverschönerung diskutiert
worn is. Wer woas.
Aba wenn des der Fall wern sollte, bitte nehmts eich koa Beispiel am
Raiffeisenhaus.
I woas ned wers plant hod, i woas ned wers baut, i mechad grod
wissen, wer des für schee befundn hod.
Wenn es beschreim miassad, dad i sogn, des is a Betonwand mit
aner Siloplane drüber.
Und de zierlichn Hoiterungen dazua , a Traum!
Wenns mit unserm Goid was bauts, warum ned wenigstens wos
scheens?
Hinterm Gebäude, die Parkplatzanlage is jo ganz schee word, aber
normalerweise gherads hoid umkehrt.
Vorn schee und hint geht’s dann nimmer gnau.
Iatz hob ma i natürlich wieder Gedankn gmacht, für wos des do vorn
ausse guat sei kunnt, aber i bin zu koam rechtn Schluss kemma.
Weil a so a Siloplane auf der Westseitn daugt ja ned amoi für Schattn.
Bei da Mauer hob i ma denkt gabs drei Möglichkeiten:
Entweder soits ois Windschutz dienen oder ois Klagemauer für de
Kundn.
Und de dritte und wahrscheinlichste Möglichkeit waar, dass ma do
die Namen und Köpfe, der inzwischen zahlriechen Vorstände und
Filialleiter, in Stein meißeln könnte.
Wart ma s ob, wos se duat.
So, iatz war ma scho im schönsten Derblecka drinn.
Obwoi, so richtig dazana wui i eh koan, weil Ironie oder gar Zynismus
sand mir fremd.
Ganz im Gegenteil, i bau de Leit wieder auf und versuch mit a paar
Tipps, dass eahna sowas ned wieder passiert.
So wia im folgenden Fall.
I hob me jo bereits vorigs Johr de Böllerschützn g widmet und dabei
aa erwähnt, wos für a wichtige Institution de sand.
Ned ganz so wichtig wia de Bauaufsicht – weil des sand nur
gemeinnützig - aber immerhin.
Übrigens war jo gestern beim Hoizmann do wieder a Böllerkurs, wo
an Haufa Neie mitgmacht ham - hoffentlich aa bestandn.
Und do warn sogar zwoa Weiberleit dabei.
Respekt!
Andererseits, gibt’s denn überhaupt no a Männerdomäne?
Wia scho erwähnt hob i mir do natürlich wieder Gedankn drüber g
macht.
Mit wos schiaßt a so a Weiterleit?
Mit an Derrenger - oder mit ana Kapslbix?
Weil an Kurt sein Schaftböller kanntns jo ned amoi dahebn.
Und wos ziang de beim Formationsschiassn o?
A Abendkleid, des kloane Schwarze oder a Dirndlgwand?
Oiso i woas ned!
Obendrein hod uns die nähere Verganganheit gelehrt, dass des
Ganze ned grod ungefährlich is.
Weil vorigs Johr sand de Böllerschützn beim Heik ent amoi zu aner
Übung zamkemma, und do hod se dann ein nicht ganz unerheblichen
Unfoi ereignet.
Noch am Schuss liegt da Fogge, des is da Weindl Franz, unser
Reservistenvorstand, der wirklich a erfahrener Schütze is, plötzlich
auf Bodn.
Wos is passiert?
Im erstn Augenblick hods so ausgschaut ois ob am Heik sein
Sicherheitsdienst ned über des Training informiert, oder schlecht
ogwiesn hod.
Später hod se dann oba aussergstoid, dass einfach vom Fogge a
Fehler war.
Wahrscheinlich a bissl unkonzentriert.
Böse Zungen behauptn iatz, dass se da Xare sei Knia richts losst, grod
dass er se in Zukunft besser eispreizn konn.
De Konsequenz daraus sollte sein, hob ma i denkt, dass ma de
Böllerer in Zukunft an jedn an Adjundantn beistoid.
Grod a guad g moanda Rat.
Oba, es werds es kaum glaam, i hätt sogor scho für jeden oan
ausgsuacht, der dazuapassn dad.
Suppn, bei dir hob i ma denkt, du kannst dein Nachbarn an Tress
Miche frogn.
Schweik bei dir waars genau a so, oiso da Pfarrer.
Beim Schoffna Sepp hob i an an Neiberger Schoos denkt, und beim
Donisleiter Hans, do dad se doch de Zündung obietn.
Halle, du kannst mitn Sechta amoi redn, und Fogge, dei ehemaliger
Nachbar, da Bademeister, der glaab i dads für di a macha.
Für de letzn viere waars a wenig schwieriger, oba aa do is ma wos
eigfoin.
Heik dasst d Ringstross ned ganz vergisst, kunnst de du um an
Oberoacha Hugo bemühn.
Und weil se Gegensätze oziangd, find i, dass da Eisn guad zum
Hofmann Worfgang bassn dad.
Da Xare hob i mia denkt, kunnt an Lippe frogn, weil der iatz aa leicht
Zeit hätt.
Und zu dir Kurt, wer dad do besser passn wia da Säger.
So, iatz schaugts amoi wos se macha losst.
Zu de Feste, wo ned gschossn wird, brauchts jo enkane Adjudantn
ned oiwei mitnehma.
Aprobes Fest.
Vorigs Jahr war jo bei uns des 100 jährige Gründungsfest von de
Veterana, und do ham de Böllerschützn in oller Friah scho
aufgeweckt.
Später sands dann bewaffnet beim Festzug mitganga.
I muaß zuagebn, i war jo zerst scho a wenig skeptisch.
Wias aber nachad beim Gegenzug mit n Gartnbauverein viranand
ganga sand, hob i mir denkt, alle mal scheena, a gstandns Mannsbuid
hod an Böller a da Hand, wia a Bleamekeabe.
Weil i grod von dem 100 jährigen von de Veteraner gered hob.
Des war natürlich ned ois, wos ma mia letzts Johr z Neikiacha gfeiert
ham.
Des 20 jährige Bestehen der Getränkequelle is do mindestens in oan
Atemzug z nenna.
Und weil des an Mois sei Projekt is - naja des Kramerin is scho Liese,
oba für Marketing und Managemet is natürlich da Mois zuaständig –
drum hods do bei de Feierlichkeiten an nix gfoid.
Des warn jo koane Festtage, des warn jo Festwochen.
Eiglodn war wirklich jeder, von jung bis oid, von grouß bis kloa.
Oa Wocha de Oidn, dann de ganzen Weiberleit, nächste Wocha d
Manna und aufd letzt no de Junga.
Einschließlich Vereine und Geistlichkeit.
Aa i war dabei, und guad iss uns ganga.
Nur oans war mir suspekt.
Zeitlebens bin i bei a na Einladung – und i war scho auf vui Feste – no
nia mit ana Drohrede gegrüßt worn.
Des wost du da vom Stape lossn host Mois, mei liabe, da kunnt oan
scho Angst und Bank wern.
So frei nach dem Motto, wenns in Zukunft ned ois bei uns eikaffts,
dann, … dann, …dann weads es scho sehng wo s hikemmts.
Und dabei hams mia vozoid, dass ma mia Manna no glimpflich davo
kemma sand, gegn d Weiba und de Oidn.
Grod guad, dass ma mia z Neikircha inzwischn a medial so guad
aufklärt san, weil sunst waars noch dera Ansprache in de nächsten
Wochen in da Umgebung zu Hamsterkäufen kemma.
Und de Oidn hättn se d Erdepfekella wieder voigmacht.
Oiso koa Angst Mois mia wisst mas scho, wos ma an enk ham und
zum draufzoin werds ned glei.
Obendrein is jo enka Lodn ois Informationsbörse fast unverzichtbar
worn.
Bei dem illustren Personal.
Wos im vergangan Johr natürlich aa im Vordergrund gstandn is,
waarn de ganzn rundn Geburtstage.
Allen voran de 61ger, weil de sand nämlich 50ge worn.
Sicher gibt’s aa in dem Jahrgang a paar dunkle Punkte, wia z. B. den
Bau der Berliner Mauer, aber wos für a Jahrgang kannt sowas
kompensiern, ausser wia scho g sogt, gell Herr Pfarrer.
Aber auf wos i eigentlich ausse woid, war, dass bei uns eben vorigs
Johr de drei wichtigsten Leit im Dorf an rundn Geburtstag gfeiert
ham.
Nämlich da Pfarrer, da Burgermoasta und da Lehrer a. D..
A 50ger und zwoa siebzger.
Jeda hod a scheens Fest gfeiert.
Aba da Pfarrer hod auf Greaboch ausweicha miassn, weil beim
Hoizmann a Hochzeit war, an der er se irgendwie ned beteilign woid.
Und des agrat am 24. Sept.
Beim Lehrer hod zwar ois klappt, grod am nächstn Tog hods dratzt.
Do war nämlich a Ausflug geplant, den aba da Done ned o tretn hod
kinna.
Wia sowas passiern ko, wird se iatz so mancher frogn.
Naja, i interpretiers amoi a so, weils du sunst aweil z wenig trinkst,
drum is dir des beim 70ger zum Verhängnis worn.
Ja, und am aller schönstn host as du ghod, Franz.
Du host beim Hoizmann gfeiert mid über 100 Leit, host an Haufa
gschenkt griagt, und organisiert und zoid hods de Gemeinde.
Aba du bist a schließlich da Burgermoasta, und bist dir aa sonst für
nix z schod.
Mein Gott, iatz hob i scho sovui g red, und hob no ned amoi an
Schützenmoasta, an Kurt, erwähnt.
Oba des ändert ma iatz, ge Kurt.
Jeds Johr, kurz vorm Starkbierfest schliaft er a wenig zuaba und
moant, sog fei vo de andern aa wos.
Dua i jo Kurt, aba an dir kimmt ma trotzdem ned vorbei.
I woas ja scho wieder gar ned, wo i ofanga soid.
Machmas einfach chronologisch.
Letzts Johr im März is da Kurt sei letzte Schitour ganga, und dabei
hod er sein Ehering verlorn.
Mit dem host scho a rechte Hetz aa, weil oamoi vergisstn zum Oidoa
und a anders Moi verlierstn nachad.
Oiso wia er des am nächsten Tag gspannt hod, geht er nomoi auf d
Hüttn und frogt überoi nach, ob sein Ring koana gfundn hod.
Aber ohne Erfolg.
Und wia er scho nimmer damid grechnet hod, griagt er des
Corpusdelikti a paar Wochen später mid da Post zuageschickt.
Und wos des delikate dro is, er hod den Ring auf an Gipfe obn
verlorn und do hodn oana gfundn und in da Hüttn obgebn.
Iatz frogt se grod, wia konn ma an Ehering im tieafstn Schnee finden?
I konn mirs grod a so erklärn, weil hoid an Kurt sei Ring ungefähr de
Dimension von an mittleren Damenarmreif hod.
Dein Freind an Miche dad no interessieren, obst du deswegen koa
Schitour mehr gehst, oder obst as einfach nimmer dapackst.
An Summa hod da Kurt an Strossnfest in da Ringstross vorbeigschaut.
Mit Kind und Hund.
Und weils eahm jo oiwei pressiert, hod er se soiba a hoibe Bier
obalossn.
Wia dann s Bier bei da Garag aussaglaffa is, hod se er wieder ausm
Staub gmacht, weil er load ghobt hod er kriagt ois nächsts a
Wandlbier, für des dass er an Wechsl ned richtig zua gmacht hod.
Ois Entschuldigung hättst jo oführn kinna, dasst as ned pritschln
gheart host, aba des hod jo do mois no koana gwisst, dass bei dir so
weit feit.
Inzwischn hod er a Hörgerät. Angeblich, dass er spannt, ob d
Motorsog abgstoid is oder ned. ….
Na, ganz so schlimm is no ned, aba d Melanie hod n zum HNO
gschickt, und da Kurt hod gar ned recht g wisst, wia eahm is.
Wia er dann an Doktor erklärt hod, dass n sei Frau schickt, weil er
angeblich schlecht heard, hod dea gmoant, do waar er ned da
oanzige.
I hätt iatz grod no oan Tipp Kurt, dua des Hörgerät aa zum Fuatgeh
ei, dasst ned oiwei ja, ja, ja sogn brauchst, wenst nix verstehst.
Und wenn dann dahoam wirklich amoi de Battrie laar is, nochad
probierst hoid andere Kommunikationsmöglichkeiten aus.
Do gfreit se d Melanie bestimmt aa.
Wo ned überoi Unzulänglichkeiten passieren kinnand, des möchst oft
ned glaam.
Z. B. beim Kaibeziahgn.
So geschehen letzts Johr beim Wenga drausst.
D Marianne is alloa dahoam und ausgrechnet do richt a Kuah zum
koibern her.
Sie trifft sämtliche Verbereitungen – und aa s Kaibe kimmt schee
langsam daher.
Sicherheitshoiber langt sie an der Kuah no kurz ei, um die Lage zu
checken.
Sie greift de Zung und folgert, dass des Ganze oba mit de Haxn ned
recht zammpasst, und ruaft deswegn sicherheitshoiba an Tierarzt o.
Wia der dann do war und sich vergewissert hod, muaß er a bissl
schmunzln, weil des Kaibe von alloa aa glei kemma war.
Es kimmt hoid rückwärts daher, sogt er.
Und es waar hoid a Stierkaibe.
Mir gehn do no zwoa Sachan am Kopf um.
Marianne, wos host du do a da Hand ghobt, wiast gmoant host des is
da Bleschl vom Keibe?
Und wo war iatz bei dem Kaibe eigentlich s Schwanzl?
Aba i mecht iatz do ned dei anatomische Vorstellungskraft in Frage
stoin.
Und vor allem bist bei dem Thema Kaibeziahng in bester Gesellchaft.
Da Doihammer Sepp woid nämlich heier am Neijohrstag aa
Kaibeziagn.
Woid!
Grod is eahm do dazua des wichtigst obganga.
Nämlich s Kaibe.
Zerst oba amoi ganz von vorn.
An Silvester aufdnocht noch da fünftn Hoibe fangt da Sepp s siniern
o, und moant, dass moang wahrscheinlich a Kuah koibern wird.
Und wahrscheinle braucht er do a Huif.
Er is dann no a zeitl gsessen und war a da Friah ned da Erste beim
Aufsteh.
Umana hoibe neine, d´Marianne war scho wieder zur Ruhe
überganga, kimmt er an Stoi und langt der Kuah eine.
Greift aber gar nix.
Daraufhin fahrt er zum Nachbarn und frogt um a Huif, wie
angekündigt.
Wia se der Nachba nachad vergewissert hod, stoid er fest, dass de
Kuah laar is.
Für den Laien: weder Kaibe noch Nachgeburt warn no in der Kuah.
Daraufhin fangan de zwee s Suach o.
Lang hods ned dauert, nachad hams des Kaibe bereits trucka und
guad eigstraat in da Kaibebox gfundn.
Do wo a Kaibe ebn hi gheart, wenns von da Kuah herausst is.
Vielleicht wars a da Friah no a weng finster, ha Sepp.
Und die Moral von der Geschicht: wennst am Neujahr morgen bist
noch dicht, mach dir im Stall wenigstens Licht.
Mach dir ned zvui draus Sepp, weil dein Nachbar hods vorigs Johr a
amoi ganz schee verfoigt.
Da Schuimer Rupert is nämlich amoi mit an blaua Augn und a paar
Pflaster aufn Hirn rumglaffa.
Wia i des s erstemoi gsehn hob, hob i mia denkt, ja wos is denn do
passiert?
Da Rupert is jo unser Vorzeigepolitiker und mag aa scho amoi ganz
schee Kontrovers diskutiern, aba raffad is er dennerst no nia woarn.
Erst vui später is durchg sickert, wos do wirklich passiert is.
Wias wissts, schloft er jo in gewissen Situationen scho amoi ei.
Z. B. in da Kiacha.
Obendrein hod er de Angewohnheit, das er se dahoam zum
Fernsehschaun, oiwei a d Ofenbank hisetzt,trotz der guten Ratschläge
seiner Frau, sich aufs Kanapee zu legen.
Und do is dann eines Tages geschehen.
Es ahnts es scho.
Jawoi, eahm hods vorwärts von da Ofabank oweghaut und hod se de
Birn aufgschlogn.
Aba Rupert tröst di, bei dir bleibt wenigstens koa Beigschmack wia
bei dein Nachbarn, weil vom Orangenschorle griagt ma koan Rausch.
Trotzdem no a Vorschlag von mir.
Entweder du nimmst den Rat vo da Rosmarie o und legst de in
Zukunft auf s Kanapee, oder du stoist da an Stui vor die Ofabank und
loanst de do drauf wia in da Kiacha, nochad kannst wenigstens ned
obefoin.
Wos ned ois gibt.
Irgendwann im letztn Johr hod da Tom Cruise an neia Film
aussabrocht. Mission Impossible Teil IV.
Wos immer des für a Schmarrn sei mag, i woaß ned.
Und wer an Tom Cruise ned kennt, des is der kloane Amerikaner, der
nur mit Weiber spuit, de weit kleana hand wia a Meta 60ge, weil er
sunst hiauf schaung muaß.
Wia a immer.
Auf alle fälle hod da Wuff, des is da Wolf Christian, bei an
Gewinnspiel zwoa Freikarten für eben den Film gewunna.
Aber leider für a Kino in Ingolstadt.
Ebbs z Essen und z Tringa soids aa gebn.
Da Wuff ruaft an Beham Markus o und moant, ob des wos waar.
Drauf recherchiert da Merkl im Internet und liest, dass vor a paar Tag
da Tom Cruise soiba do war und dass a riesn Buffet gebn hod.
Und des kannt jo wieder sei.
Oiso machen se de zwee auf und fahrn auf Ingsolstadt, wo se dann
rausgstoid hod, dass der scheiß Tom Cruise doch heid wirklich koa
Zeit ghobt hod.
Dafür hams an da Kasse a kloans Cola und a Packe Popcorn kriagt.
Für jedn versteht se.
Ned schlecht find i.
Für des kann ma scho amoi a poor Kilometa weida as Kino fahrn.
Da Merkl mid seine 19 Jahr is hoid no a bissl blauäugig, aber du
Wuff!
Glaabst denn du no ans Christkindl?
Kann ja fast ned se, weil du gehst jo scho seit 20 Johr ois Nikolaus
umanand.
Fast kannt ma moan ois Weihnachtsmann.
Und übrigens, da Tom Cruise wenn beim Wirt ent hinterm Stoll
drausst war, i gang ned a moi fia d Haustür ausse.
Mein Gott, da Herr Pfarrer, iatz hätt i di boid vergessn.
Rangmäßig warst jo du scho lang dro gwenn.
Da hob i mi iatz glatt a bissl verschmatzt.
Du host wahrscheinlich gmoant, der Kelch waar scho an dir
vorüberganga.
Aber zu früh gefreut.
Im Herbst hod da Pfarrer in seim Garten nämlich an mords Unfoi
ghobt.
Es wissts jo olle, dass im Pfarrgartn a scheene Hoizhittn steht.
Allerdings hod de da Pfarrer Allram bau lossn.
Natürlich nach Allram Maßen.
Und Allram Maße sand nicht Thaller Maße.
Ja und eines Tages kimmts wia s kemma muaß, da Armin geht an
dera Hüttn vorbei und rennt mit da Birn ungeschützt an Windfang oi.
Obwoi eahm s Bluat abalafft, ruaft er sofort an Schmiedpaule Schoos,
seines Zeichens Schreiner, o, und sogt er soi sofort den Windfang
obschneidn.
Des hätt zwar jeda andere aa kinna, aba warum an Zimmerer frogn,
wenn ma an Schreiner kennt.
Kurzum, da Schoos kimmt sofort, bringt de Sach in Ordnung und gibt
an Pfarrer den guadn Rat, er soi doch zum Dokta geh.
Auf d Nacht an Heimatabend kimmt dann da Armin aa, verzoid sein
ganzen Leidensweg und sogt, dass er beim Wapler war.
Drauf moant ein neutraler Zuhörer, wos er denn beim Tierarzt do
hod.
Zur allgemeinen Aufklärung, es gibt sowohl an Dokta ois auch an
Tierarzt, der Wapler hoaßt.
Der obligatorische Tipp von mir, um deine Schwachstellen besser zu
schützen waar folgender:
Vielleicht host du ja in deim Handy scho a Navi drinn.
Und wenn ma do no so a Art Einparkhilfe nachrüstn kannt, de ca. an
hoiben Meter vorm Aufschlag piepst, dann waar des perfekt.
Natürlich miaßad der Sensor Höhe, Breite und Tiefe berücksichtigen,
dann hättst du praktisch an rundum Schutz.
A Dauerthema bei meine Predigten is s Walken.
Ob mit oder ohne Stecka bei uns z Neikiacha hod des scho längst
Kultstatus erlangt.
I woas gar net, wia vui Gruppn do inzwischen umanand wackln.
Inzwischen konn passieren, dass a Hauffa Stockenten auf an Schwarm
Laufenten trifft.
Und so schnoi wia z. B. d Irmi, da Braun, oder a Sigi beim Joggen
unterwegs sand, da kunnt ma scho moan, dass de kurz vorm abhebn
warnd.
A so wia s es drauf seids, schaffts des aa no.
Do dadn dann de Taufkirchna und Pollinger schau, wenn i nächsts
Jahr verkünden kunnt, dass ma mia zu unsere Stock- und Laufenten
aa no Flugenten dazukriagt ham.
Übrigens, kannts iatz enkane Gehstrecken rund um an Aiglwoid
erweiten, weil der Froschverkehr so guad g regelt is, dass nimmer
load ham brauchts, dass auf an so an schloazigen Broadling auffe
steigts.
Wer iatz des ned verstandn hod, dem sog i s no moi auf Hochdeutsch:
ihr braucht keine Angst mehr zu haben, dass ihr auf eine glitschige
Kröte tretet.
Siem Unterführungen ham de Wahnsinnign für de bledn Fresch an
Aiglwoid entlang eibaut.
Und des sand Brückenfundamente, weil da Herr Frosch in am 30ger
Rohr Platzangst griagt.
Wenns dann fertig is ,kost des Ganze 170 000€.
Und wenn mas an Fremdn verzoid, nachad lacht er de aus, weil er
moant du mechst eahm an Bärn aufebindn.
Eigentlich waars aa zum Lacha, wenns ned so traurig waar.
Weils nebenbei an Schulen und Kindergärten an Haufa zum Richtn
gab.
Dazua is oba koa Goid do.
Armes Bayern!
Wenn i iatz zu mein letztn Event kimm, nachad wead se oana denga,
ja, i war doch scho dro.
Aba i konn do ned hoifa, weil sowos deaf ma einfach ned auslossn.
Des miassad i glatt beichten.
Mitte Juni war nämlich von da Feierwehr aus a große Pilgerreise nach
Rom.
Aa von Oberneukiacha war a Abordnung dabei.
Unter anderem da Doihammer Sepp und meine Wenigkeit .
Und wia s a so da Brauch is gheart zu na Romreise natürlich aa a
Papstaudienz dazua.
Wer no nia dabei war, dem mecht i ganz kurz erklären, wia des
oblafft.
Ma wead nochm Frühstück zum Petersplatz gfahrn, hod do an
reservierten Sitzplatz und d Audienz soiba dauert maximal 1 1/2
Stund.
Oiso um hoibe 12e is ois vorbei.
Grod fürn Doihammer Sepp war des Ganze a bissl zu langatmig.
Und weil bei eahm um hoibe 11e Brotzeit is, dann is des aa z Rom a
so.
Ob iatz do grod da heilige Vater red oder ned.
Oiso umara hoibe 11 e, mittn a da Audienz, packt d Marianne an
Sepp sei Brotzeit aus und er meamed a wenig dahi und loosts eahm
schmecka.
Wia er feadig war, nimmt er se no wos z tringa, losst se zruck und
schloft in aller Ruhe ei.
Wos mi grod gwundert hod ist , dass er koa Bier dabei ghobt hod, wei
des nimmt er normal um dreiviertl oife.
I hob grod awei Angst ghobt, von da hohen Geistlichkeit segtn ebba.
Mia hamma nämlich weit vorn gsessn, und des weans so oft ned
hom, dass oana unter da Audienz schloft.
Mia hod des spontan an die schlafenden Jünger am Ölberg erinnert.
Ned zum Ausdenga, wia ma uns mia schiniert hättn, wenn da Papst
übers Mikrofon gsogt hätt: „Josef du schläfst“.
Na, i konns enk gor ned sogn, wos mia do ois durch an Kopf ganga is.
Weil stoids eich amoi folgendes Zenario vor:
Irgend ebba hätt an Sepp verklogt und da Gänswein waar kemma und
hätt gfrogt „wer schläft hier“.
I fürcht mia waars ganga wia seinerzeit an Petrus und hätt
gàntwortet.
„Ich kenne diesen Menschen nicht“
Und wenn mi iatz gach oana frogn dad, ob i eahm aa dreimoi
verleugnet hätt, dann muaß i eich sogn „ Ich weiß es nicht“
Dafür kriagst du vo mia wenigstns koan guadn Rat nimma Sepp, weil
des is oiwei scho wias is.
Und auf Rom fahr ma mia zwee sowieso nimmer, wei des sechane
Strapazn hand.
Oba seis wia da woid Sepp, es steht geschrieben:„den seinen gibs
der Herr im Schlaf“.
So, iatz iss …Uhr.
I glaab i los end iatz a Ruah.
Moment, oans wuid i eich no vozoin.
Mei Schwoger, da Heiz, hod letzts Jahr de erste Wuidsau im
Neukirchna Jagdgebiet, seit wahrscheinlich König Ludwigs Zeiten,
erlegt.
I hob enk ja vor zwoa Jahr scho erzoid, wia man mia, de ganze
Familie, auf seim Werdegang zum Waidman unterstützt ham.
Weil es gibt jo Leit, de behauptn, a Jager is a grün o zogns Mandl, des
aufm Weg ins Wirtshaus, angetrunken und bewaffnet durchn Woid
geht.
Aba davon mecht i mi ausdrücklich distanziern.
Mia samma stoiz auf unsern Schwoga.
Und iatz streckt der glatt a Wuidsau nieda.
Do fuid ma se dann scho irgendwia bestätigt.
Aba nichts desto Trotz is vor a poor Wochen beim Hoizmann in da
Gaststubn, zu später Stunde die Diskussion entbrannt, wer denn de
Wuidsau aus Oberneukircha vertrieben hod, weil momentan scheins
koa do sand, moant aa Heinz.
Drauf moant da Kurt, des waar de Böllerschützen zum verdanga, dass
de furt san, weil sie oiwei o laut schiassn.
Drauf moid se da Moifa Luck zu Wort und berichtet, dass z Moihof
obn grod gnua Wuidsau an Mais drinn warn.
Do hob ma i dann de Frage gstoid, wer denn nun die klügere Spezies
ist, d Wuidau, da Jaga oder da Böllerer?
I loß iatz de Frage a so im Raum steh und appelier
an d Wuidsau:“ passts guad auf, denn es gibt mehra Jaga wia ma
moant“
an d Jager: „ seits zielsicher, dass ausser Bekannte aa wos treffts“
und an de Böllerschützen „ duats oiwei schee d Ohrstöpsln ei, dass
ned so doorad werds wia da Kurt“
In diesem Sinne, bleibt wia s heits.
Aba seits wachsam und passts guad auf wer enk wos verzoid.
Denn nicht alle heissen Jonathan!
Bis nächsts Johr.
Vieleicht klär ma dann auf, wer von dene drei de Schlauern sand.
So Gott will.
Amen