2. O le Valea o le Fouvale

Lesona 2
O LE VALEA O LE FOUVALE
O Le Amataga o le Agasala
O le agasala o se uiga lea o le tagata e lē mafai ona mua’i iloa a’o le’i faatinoina.
Aisea ua matuā tele ai mafatiaga lē mafaitaulia, tiga, ma puapuaga matautia i lenei
lalolagi? O le a lea mea o le agasala? O anafea ma na faapefea foi ona amata? O
fa’amaumauga inosia o soligatulafono ma le sauā ua faafefeina ai o tatou lagona.
Ae o tali i suesuega faatatau i le talaaga o le lalolagi ma mea o tumu ai ma mea o
tutupu ai ua foliga mai ua lē malamalama i ai mafaufau ta’uta’ua.
O loo i ai se fofō i lenei faafitauli ua leva, ma tatou te manaomia ina ia tatou
vailiiliina mai i le puna mamā o suesuega uma lava, le Tusi Paia, le Upu lea a le
Atua, ina ia maua ai le tali.
PE SA I AI EA LAVA LE AGASALA I LE AMATAGA?
O le Atua e atoatoa ona lelei ma o mea uma lava na Ia faia e atoatoa foi ona lelei. I
totonu o le Tusi Paia o loo tatou maua ai se taimi sa lē i ai se agasala. O le Atua e
Ona le malosi uma lava o le auga atoa lea o le tapuaiga ma le faaaloalo a mea ola
uma. Sa pule aoao le filemu atoatoa ma le loto gatasi ma sa faatumulia le vateatea i
le fiafia. “Ina o pepese faatasi fetu o le taeao, ma alalaga atalii uma o le Atua
ona o le olioli” – Iopu 38:7.
I meaola uma lava na foafoaina, o agelu, o i latou ia sa sili ona popoto, ma sa tele
lo latou matagofie ma lo latou malosi.
“Faamanū atu ia iā Ieova outou ana agelu o e malolosi tele, o e faia Ana
faatonuga, o loo faalogologo i le leo o Lana Upu.” – Salamo 103:20. O i latou o
auauna a le Atua, o loo sauni e faatino Ana faatonuga i taimi uma lava.
E tasi le agelu sa sili i agelu uma lava i lona poto ma lona matagofie. I lalo o le
igoa fa’afa’atusa o le “Tupu o Turo” sa tusia ai e Esekielu e faatatau ia te ia: “Le
atalii e o le tagata, ia e faia se pese e aualofa ai i le tupu o Turo, ma fai atu ia te
ia, O loo faapea ona fetalai mai o le Alii o Ieova; ua ē faamau faailogaina le
atoatoa; ua tumu oe i le poto, ua atoatoa foi lou matagofie. Sa i Etena oe i le
faatoaga a le Atua, o ma’a taua uma sa fai lea ma ou ufiufi, o le salikea, topasi,
ma le ialoma, ma le tasesa, ma le soama, ma le iasepi, ma le safaira, ma le
nofeka, ma le pereketa, atoa ma auro; na fai au topa ma au fagufagu; na saunia
ia i le aso na foafoaina ai oe. O oe o le kerupi faau’uina e faamalumalu; na
faapena ona ou tuuina oe: sa ē i luga o le mauga paia o le Atua; sa ē fealualua’i
1
i le va o ma’a afi. Sa atoatoa lou lelei i ou ala uma talu le aso na foafoaina ai oe,
se’ia o’o ina maua le amioleaga i totonu ia te oe.” – Esekielu 28:12-15.
Na fausia e Lusifelo se uiga faamaualuga ma le sese na faaleagaina ma suia ai lona
natura i se natura o le agasala ma le taufaasese. O lana puleaga leaga o loo
maitauina i isi ona igoa o le Tiapolo ma Satani.
O ia, o lē na sili ona matagofie ma sili ona poto nai lo meaola uma na foafoaina, sa
ia tauaveina le igoa o Lusifelo, le atalii o le taeao, o lona uiga o le “fetu ao” –
(Isaia 14:12). Maitau lona tulaga: “o le kerupi faau’uina e faamalumalu.” Na ia
tulai i luma o le Atua Foafoa Silisili Ese, ma o ave o le pupula sa ufitia ai le Atuafaavavau, sa i ona luga lea.
O FEA NA AMATA AI LE AGASALA?
O lona tulaga e sosoo ma Keriso, o Lusifelo, sa sili ona faamamaluina e le Atua
nai lo agelu uma. E faapei ona vaaia soo i le tele lava o taimi i le talaaga fa’aletagata, o le faamaualuga faalialiavale i lona matagofie tele ma lona malosi lea na
mafua ai lona pa’ū: “Sa atoatoa ona lelei oe i ou ala uma talu le aso na
foafoaina ai oe, se’ia o’o ina maua le agasala i totonu ia te oe. O lou faatauina o
oa ina tele ua faatumuina ai oe i le sauā, ma ua ē agasala: o le mea lea o le a
Ou lafo ese ai ia te oe o pei o se mea leaga i fafo o le mauga o le Atua: o le a Ou
faaumatia foi ia te oe, o oe le kerupi faamalumalu, mai i le va o maa afi. Na
siitia i luga lou loto ona o lou matagofie, ua ē faaleaga i lou poto ona o lou
pupula: O le a Ou lafoina oe i lalo i le eleele, o le a Ou tuuina oe i luma o tupu,
ina ia latou vaavaai ia te oe.” – Esekielu 28:15-17.
Na muai teufatuina lava le agasala e le agelu silisili lava i le lagi. Ona o lona
matagofie, na faatumuina ai Lusifelo i le faalialiavale faamaualuga ma na ia
faanaunau ai loa ina ia tutusa o ia ma le Atua.
“Auā ua ē faapea ifo i lou loto, o le a ou alu a’e i le lagi, o le a ou siitia a’e lo’u
nofoalii i luga a’e o fetu a le Atua: o le a ou nofo foi i luga o le mauga o le
faapotopotoga, i le itu i matu: o le a ou alu a’e i luga a’e o ao; o le a avea a’u e
faapei o Lē e silisiliese.” – Isaia 14:13, 14.
E ui lava ina aumai mai i le Atua le mamalu uma o Lusifelo, na i’u ina ua ia
manatu o lona mamalu e patino ia te ia lava. O le lē faamalieina o ia i lona tulaga
sa i ai, na ia lē fefe ai e mana’ona’o (covet) i le mamalu ma le viiga e patino i le
Atua Foafoa e toatasi. E aunoa ma lona saili ina ia faasilisilina le Atua i le alofa
ma lagona o mea ola uma lava na foafoaina, sa ia saili ai ina ia maua mai lo latou
auaunaga ma lo latou faamaoni ia te ia lava, ma faapena ona ia faatauanau ai ma
faaosooso ia i latou ina ia latou tetee i le Atua ma Lana tulafono. O le loto vii
faalialiavale faamaualuga o Lusifelo o le amataga lea o le agasala uma lava. “E
muamua le faamaualuga i le malaia, e muamua foi le loto faasiasia i le pa’ū.
“. . . ne’i siitiaina a’e i luga i le faalialiavale lona loto, ona pa’ū ai lea o ia i le
faasala a le tiapolo.” – 1 Timoteo 3:6.
2
“O outou nai lo outou tamā le tiapolo, o le a outou faia foi mea e tuinanau i ai
lo outou tamā. O le fasioti tagata o ia talu le amataga, e lē’i tumau lava o ia i le
upu moni, auā e lē oi totonu lava ia te ia le upu moni. A tautala o ia i le pepelo,
o lana lava lea e tautala a’i, auā o le pepelo o ia, ma le tamā o le pepelo.” –
Ioane 8:44.
E MAFAI EA ONA I AI PEA LE AGASALA I TOTONU O LE
LAGI?
O le tetee a lenei agelu, o se faiga taufaasese lea ma feteena’i lea ma tulafono
faale-natura a le lagi. O Lusifelo, poo Satani, na ia manumalo i le faaseseina o le
tasi o vae tolu o agelu o ē na filifili i le taimi lena e mulimuli ia te ia.
“O lona i’u foi na ia tosoina le tasi-o-vae-tolu o fetu o le lagi, ... – “ Faaliga
12:4.
Lua tapulaa feteena’i, o le amiotonu ma le amioleaga e lē mafai ona ola faatasi, ma
na faapena ona i’u ai le tetee a Satani i se taua faale-agaga i le lagi. Na auai agelu i
le taua. O Mikaeli, le Alii o agelu, o Ia foi o Keriso, na Ia ta’ita’ia agelu faamaoni
ma sa Ia manumalo ia Satani ma lana vaega: “Ona i ai lea o le taua i le lagi: o
Mikaeli ma Ana agelu sa tau ma le tarako; ma sa tau foi le tarako faapea foi ma
ana agelu, na latou lē manumalo; e le’i toe maua foi se nofoaga i le lagi mo i
latou. Ona lafoina lea i fafo o le tarako tele, lena gata tuai, ua faaigoaina o le
Tiapolo, ma Satani, o lē faasese i le lalolagi uma: sa lafoina o ia i fafo i le
lalolagi, na lafo ifo foi ana agelu faatasi ma ia.” – Faaaliga 12:7-9.
“Oi! Ua faapea ona pa’ū mai le lagi, oe Lusifelo, le atalii o le taeao!” – Isaia
14:12.
O Keriso, a’o i ai o Ia i luga o le fogaeleele lenei, sa Ia molimau i le pa’ū o Satani:
“Ona fetalai atu lea o ia ia i latou, na Ou vaai ia Satani e faapei o se uila o pa’ū
mai nai le lagi.” – Luka 10:18.
UA FA’AAUAUINA LE GALUEGA LEAGA I LUGA O LE
FOGAELEELE
Ina ua uma ona tuliesea mai i le lagi Satani ma le tasi o vae tolu o ana agelu, na ia
sau loa e faaosooso le ulua’i tane ma le ulua’i fafine muamua lava sa pule i le
lalolagi lē sala.
“Oi talofa i ē o nonofo i le fanua ma le sami! Auā ua alu ifo le tiapolo ia te
outou, ua lotoa tele, auā ua ia iloa ua puupuu ona taimi.” – Faaaliga 12:12.
E ui lava ina na’o ni nai faamatalaga pupuu o loo aumaia e le Tusi Paia, ae e mafai
ona tatou malamalama sa faaaogaina e Satani le gata e avea o se auala e faasese ai
le fafine. O ia foi (le fafine), sa faaaogaina e avea o se auala e faasese ai le tane.
3
“Ua sili le atamai o le gata nai lo manu uma o le vao na faia e Ieova le Atua. Na
fai atu o ia i le fafine, e moni ea, na fetalai atu le Atua, e aua ne’i lua aai i fua o
laau uma o le faatoaga? Ona fai atu ai lea o le fafine i le gata, E mafai ona ma
aai i fua o laau o le faatoaga: Ae o le fua o le laau o loo i le ogatotonu o le
faatoaga, ua fetalai mai le Atua, Aua lua te aai ai, aua foi lua te pa’i atu i ai,
ne’i lua oti. Ona fai atu ai lea o le gata i le fafine, O le a lua lē oti lava:” –
Kenese 3:1-4.
Na faia e Eva lona sese muamua ina ua ia alu ese mai i lana tane ma ua ia faalogo i
le tiapolo taufaaosooso. Ona avea loa lea o ia ma a’upega a Satani e ala i le ofoina
atu ia Atamu o le fua lea na ia aina. O lo la pa’u’ū i le agasala ua leai ai nei so la
malosi e tetee atu ai i faaseseega a le tiapolo. O lo la lē usitai i le faatonuga a le
Atua, na ulufale mai ai le agasala i le lalolagi. O lenei ua auauna le aigā tagata i le
pule sa la filifilia! O loo faaauau pea e Satani ma ana agelu pa’u’ū lo latou
faaosooso i le aigā tagata ma latou tetee ai i le galuega a le Atua. E mafai ona tatou
vaaia i’uga matautia tele i o tatou itu uma.
“Ia outou faautauta, ia outou mataala; ona o lē ua fai outou ma ona fili, o le
tiapolo lea, o loo fealualua’i o ia e pei o se leona tagi, e saili se tasi e aina e ia” –
1 Peteru 5:8.
“Ia oofu outou i le ofu tau atoatoa a le Atua, ina ia outou mafaia ai ona tetee
atu i togafiti a le tiapolo. Auā tatou te lē o tau ma tagata, a’o alii sili, ma faipule,
ma alii o le pouliuli o lenei lalolagi, ma agaga leaga uma i nofoaga
maualuluga.” – Efeso 6:11, 12.
E ui lava ina atonu e lē o iloa e tagata fuafuaga a Satani, a’o loo i ai pea lenei fili
malosi i o latou ala. O loo ia ulufale mai ma le lē valaauliaina i totonu o aiga taitasi
uma lava, i vaega uma lava o o tatou aai, i totonu o a tatou ekalesia, i totonu o fale
faitulafono o malō, i totonu o fale faamasino, ma faasese, ma faaleaga amio, ma
faafanoina i soo se nofoaga lava tino ma agaga o tagata matutua ma fanau iti,
talepeina aiga, lūlūina le loto leaga ma le ita, matau’a ma le fasioti tagata. Ma e
foliga mai o loo manatu Kerisiano o nei mea uma na fuafuaina e le Atua ma e tatau
ona tutupu.
AISEA NA FAATAGAINA AI LE AGASALA?
Na tuua’ia e Satani le faigamalō a le Atua i le feteena’iga na faatupuina e lana lava
tetee i le lagi. Na ia faailoa mai o mea leaga uma lava o le iuga lea o tulafono a le
lagi. Na ia fai mai o lana sini o le toe faaleleia atili lea o le tulafono a le Atua. O le
mea lea na faatagaina ai o ia e le Atua ina ia faailoa mai le natura o ana faaupuga,
ina ia faailoa mai i’uga o ana suiga i le tulafono a le lagi. O ana lava galuega na
faatagaina ina ia faasalaina ai o ia. Ona na ulua’i fai mai lava Satani i le amataga e
le’i tetee o ia, e tatau la ona vaaia e lalolagi uma lava le faaaliaina o le tiapolo tau
faasese.
Ina ua tuliesea Satani mai i le lagi, o le Atua, i Lona poto lē mafuatia, na Ia lē
faaumatiaina lava o ia. O tagata uma o le vateatea atoa, ona e le’i saunia i latou e
4
malamalama i le natura poo i’uga o le agasala, e le’i mafai ai i le taimi lena ona
latou vaaia le faamasinoga tonu a le Atua i le faaumatiaina o Satani. Ana
faaumatiaina Satani i le taimi lava na ia agasala ai, semanu o le a auauna nisi i le
Atua ona o le mata’u ae lē o le alofa. E mo le lelei la o le vateatea o lalolagi uma i
le olaga e faavavau faavavau lava, e tatau ai ona ia faaalia atoa lava ana tapulaa,
ina ia vaaia ai e meaola uma lava na foafoaina ana tuua’iga aga’i i le malō o le
Atua i lo latou malamalama moni. O le tonu ma le alofa o le Atua ma le lē masuia
o Lana tulafono e tatau ona matuā faamaonia lava e faavavau e aunoa ma le toe
fesiligia.
“. . . Le Alii e, le Atua e ou le malosi uma lava, ua tetele au galuega e ofo ai; e
tonu ma faamaoni ou ala, le Tupu o le au paia. O ai o le a lē mata’u ia te Oe, le
Alii e, ma vivii atu i Lou suafa? Auā ua na o Oe lava e paia: auā o le a o mai
malo uma lava ma ifo mai ia te Oe; auā ua faaalia Au faamasinoga tonu.”
– Faaaliga 15:3, 4.
O LE I’UGA O LE AGASALA
Ua lata tele mai le i’uga o le agasala ma mea leaga uma. O le a faaumatiaina i se
faaumatiaga e matuā fufulueseina ai lava le agasala ma o le a lē toe tulai mai lava
lona tulaga leaga. O Satani, le a’a o le agasala, ma ona soo o lālā ia, o le a
faaumatiaina e faavavau.
“Auā faauta, o le a oo mai le aso e mu ai e pei se umu; ona fai ai lea ma
tagutugutu o saito o ē faamaualuluga uma, atoa ma ē fai amio leaga uma; e
susunuina foi i latou i le aso o le a o’o mai, ua fetalai mai ai Ieova o ‘au; e lē
faatotoeina ai mo i latou se a’a poo se lālā laau.” – Malaki 4:1.
“O le a fai atu foi o Ia ia i latou o loo i Lona itu tauagavale, O ese atu ia ia te
A’u, outou ua faafanoina i le afi e faavavau, ua saunia mo le tiapolo ma ana
agelu” – Mataio 25:41.
O le a lē toe i ai lava se agasala, o le a lē toe i ai foi se oti o le i’uga lea o le agasala.
“O a ea mafaufauga o loo outou tetee ai ia Ieova? O le a Ia matuā faamuta
lava; o le a lē toe tupu faalua se puapuaga” – Nauma 1:9.
O le a toe faafoisia le lalolagi i lona matagofie sa ulua’i i ai muamua, i le tulaga e
lē mafai ona ulufale atu i ai le agasala ma le oti. O iina e maua ai e malō o le au
faaolaina lo latou aiga e faavavau.
“Ae faatalitali i tatou i le lagi fou ma le lalolagi fou, e pei o Lana na folafola
mai, e nofo ai lē amiotonu” – 2 Peteru 3:13.
“O le a soloiesea foi e le Atua loimata uma nai o latou mata; o le a lē toe i ai foi
se oti, poo se faanoanoa, poo se toe tagi, o le a lē toe i ai foi se tiga; auā ua
mavae mea muamua. Na fetalai mai foi Lē na nofo i le nofoalii, Faauta, Ou te
faia ia fou mea uma lava. Na Ia faapea mai foi ia te a’u, Ia e tusi; auā o nei upu
e moni ma faamaoni ia” – Faaaliga 21:4, 5.
5
O le matagofie o lena laueleele folafolaina mai o le a matuā sili atu nai lo le vaaiga
sili ona matagofie e mafai ona manatu i ai o tatou mafaufau.
“Ae pei ona tusia, O mea e le’i vaaia e mata, e le’i lagona foi e taliga, e le’i oo
foi i le loto o se tagata, o mea ia ua saunia e le Atua mo i latou o e alolofa ia te
ia” – 1 Korinito 2:9.
O le Upu a le Atua e moni lava i taimi uma. E lē mafai ona lē taunuu Ana
folafolaga. Uo pelē, e te fia nofo ea i le lalolagi fou?
Lomia e le: Upu Moni Mo Le Taimi Lenei
PO Box 6458 Apia WESTERN SAMOA
6
O LE VALEA O LE FOUVALE
O le Amataga o le Agasala
1.
Na amata le agasala i: (li’o le tali sa’o)
a)
le Atua
b)
tagata
c)
Lusifelo
d)
sa i ai lava i le amataga)
e)
e lē iloa e se tasi
2. Sa’o pe Sese (tusi le Sa’o poo le Sese).
..... O Lusifelo sa avea o se agelu silisili lava ona maualuga.
..... O Lusifelo sa tutusa i la’ua ma Keriso.
..... O le faalialiavale faamaualuga loto vii o Lusifelo na mafua ai lona
pa’ū.
..... O Satani o le tamā lea o agasala uma ma le pepelo.
..... Na avea Lusifelo ma tiapolo e ala i lona agasala.
..... E leai ma se agelu a le Atua na faaseseina e Satani.
3.
O le a le i’uga o le tetee i le lagi? Togi le tali sa’o. Tusi se ekisi
(x) i le tali sese.
..... Na ulufale mai le agasala i totonu o le lalolagi e ala ia Satani.
..... Na filifili le Atua ina ia faaumatia Satani i le taimi lava na ia agasala
ai ma faapena ona faamuta ai le agasala.
..... O loo faataga e le Atua Satani ina ia ia faailoa atu i le vateatea atoa o
lalolagi i’uga atoa o le agasala.
..... O le a faaumatiaina mulimuli lava e faavavau Satani.
..... O le a salamō ma liua Satani i se aso mai i lana tetee.
..... O le a faatūina mulimuli lava e le Atua se malō amiotonu ma le paia
ma e lē toe i ai loa se oti ma se faanoanoa.
4.
A tatou faia se agasala, e sili atu ea ona faigofie pe faigata ona
gaua’i atu i se faaosoosoga lona lua ina ia toe faia lena lava
agasala?
___________________________________________________________
___________________________________________________________
___________________________________________________________
5.
O le a toe tulai faalua mai ea le agasala i se taimi i le lumanai?
___________________________________________________________
___________________________________________________________
___________________________________________________________
7
6.
Fa’auma le fuaiupu lenei:
“O le a soloiesea foi e le Atua ___________ uma mai i o latou mata, o le
a lē toe i ai foi se ____________, poo se ____________, poo se
___________, o le a lē toe i ai foi se ___________, auā ua ___________
atu mea muamua. Ua fetalai mai foi Lē tietie i le nofoalii, Faauta Ou te
faia ia ____________ mea uma.”
– Faaaliga 21:4, 5.
Igoa _____________________________________
Auala & Numera ________________________
Nuu/Taulaga/Aai ________________________
Setete _________Numera Itumalō ________
Atunuu _______________________________
Faamolemole faafo’i lenei Ta’iala Toe Iloiloina i le Tuatusi lenei:
SU’ESU’EGA FETUSIA’I o le UPU MONI MO LE TAIMI LENEI
P O Box 6458, Apia, Western Samoa
TA’IALA TOE ILOILOINA - LESONA 2
8